Цагдаагийн байгууллагад 2025 оны хоёрдугаар сарын 4-нд иргэн Л “А гэгч нь цахим орчинд намайг орон байрны хулгайч гэж худал мэдээлэл тараагаад байна” гэх гомдол гаргаж, шалгуулахыг хүсжээ.
Шалгалтын явцад тогтоогдсон баримтад үндэслэн иргэн Л-ийн гаргасан гомдлыг хэрэг бүртгэлтийн хэрэг нээхээс татгалзах саналтайгаар энэ сарын 19-ний өдөр Хан-Уул дүүргийн Прокурорын газарт хүргүүлсэн байна.
Тус Прокурорын газраас хэрэг бүртгэлтийн хэрэг нээхээс татгалзах саналтай хүргүүлсэн материалыг хянаад, хоёрдугаар сарын 20-ны өдөр иргэн А-д холбогдуулан Эрүүгийн хуулийн 13.14 дүгээр зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татах тогтоол үйлдэж хэргийг Цагдаагийн байгууллагад буцаан хүргүүлсэн байна.
Мөрдөгчөөс энэ сарын 21-ний өдөр А-д хяналтын прокурорын эрүүгийн хэрэг үүсгэж, яллагдагчаар татах тогтоолыг танилцуулах ажиллагааг хуульд заасан үндэслэл журмын дагуу явуулсан гэж ЦЕГ-аас мэдээллээ.
Мэдээллийн эх сурвалж: gogo.mn
