Цахим спортын Counter Strike-2 (CS2) тоглоомын хоёрдугаар зэрэглэлийн “PGL Bucharest 2026” тэмцээний шигшээ шатны тоглолтууд Румын улсын Бухарест хотод болж, “The MongolZ” багийнхан хүрэл медалийн эзэн болжээ.
1.2 сая ам.долларын шагналын сантай тэмцээний шөвгийн наймд ОХУ-ын “PARIVISION” багийг 2:1-ээр хожсон ч хагас шигшээд “FUT Esports” багт 0:2-оор хожигдсон. Харин гуравдугаар байрын төлөө Францын “3DMAX”-ыг 2:0-ээр илт давуу ялалт байгуулав. Уг тоглолтод “The MongolZ”-ийн тамирчид эсрэг багтаа ердөө долоохон үе алдаж, 26 үе авсан бөгөөд Techno буюу М.Содбаяр хамгийн өндөр үзүүлэлтэй тоглосон байна. Манай баг 2026 он гарснаас хойш өндөр чансаатай таван тэмцээнд оролцохдоо анхныхаа медальт байрыг эзэлж байна. “PGL Bucharest 2026” тэмцээнд гуравдугаар байр эзэлснээр 150 мянган ам.долларын шагнал авч, дэлхийн чансааны тавд бичигдэж эхэллээ.
Тэднийг одоо ирэх сарын 7-нд Казахстаны Астана хотод эхлэх “PGL Astana 2026” тэмцээн хүлээж байна. Тус тэмцээн нь 1.6 сая ам.долларын шагналын сантай бөгөөд дэлхийн шилдэг 16 баг өрсөлдөнө. Манай улсаас “The MongolZ”-оос гадна “Huns Esports” баг энэ тэмцээнд оролцох ажээ.
Мэдээллийн эх сурвалж: eguur.mn
