Хүнс, хөдөө аж ахуй, хөнгөн үйлдвэрийн яамны сайд Ц.Идэрбат: Монголын арьс, ширний холбоотой хамтран түүхий эд бэлтгэх тогтолцоог бий болгох эхний алхам туршилтыг сумдуудад эхлүүлнэ.
Салбарын сайдын хувьд өнөөдөр /2026.05.06/ Засгийн газрын ээлжит хуралдаанд “Эмээлт эко аж үйлдвэрийн парк”-ийн дэд бүтцийн бүтээн байгуулалтыг эрчимжүүлэх талаар танилцуулж, Засгийн газраас холбогдох үүрэг даалгаврыг авлаа.
Тухайлбал, Нийслэлийн Засаг дарга бөгөөд Улаанбаатар хотын захирагч Х.Нямбаатарын хамт тус паркийн дэд бүтцийн барилга байгууламжийн ажилд шаардлагатай санхүүжилтийг улсын төсвийн хөрөнгө оруулалт болон олон улсын төсөл, хөтөлбөрт тусгах санал боловсруулахаар боллоо. Арьс ширний үйлдвэрүүдийг тус паркт үйлдвэр барихад шаардлагатай хөнгөлөлттэй, урт хугацаатай зээлийн эх үүсвэрийг шийдвэрлэх боломжит хувилбарыг судлан 2026 оны гуравдугаар улиралд багтаан тус тус танилцуулах юм.
Эргэн сануулахад, “Эмээлт эко аж үйлдвэрийн парк”-ийн үйл ажиллагаатай танилцаж, арьс ширний холбооны удирдлагуудтай шат дараатай уулзалт хийсэн. Уулзалтаараа зах зээл дээр хэт үнэгүйдэж, хог дээр хаягдах болсон малын гаралтай түүхий эд, арьс, ширийг эдийн засгийн эргэлтэд оруулахаар зорьж буйгаа илэрхийлж түүхий эд бэлтгэлийн нэгдсэн тогтолцоог бий болгох бодлого, төлөвлөлтийг хийх чиглэл өгөөд байна. Арьс ширийг дотооддоо боловсруулах, нэмүү өртөг шингээж эдийн засгийн эргэлтэд оруулах, экспортлох гарц бол “Эмээлт эко аж үйлдвэрийн парк” юм.
Одоогоор баруун бүсэд Ховдын үйлдвэр технологийн парк, төвийн бүсэд “Эмээлт эко аж үйлдвэрийн парк”-ийг барьж байгуулахаар төлөвлөж, бүтээн байгуулалтын ажлууд нь үргэлжилж байна.
