Баянгол дүүргийн 22 дугаар хороонд гэр бүлийн зургаан хүн угаартсаны улмаас нас барсан байж болзошгүй харамсалтай хэрэг гарсан. Тэгвэл үүнтэй холбогдуулан талийгаачдын ар гэрээс өнөөдөр /2025.02.06/ мэдээлэл өглөө.
О.Одбаяр:
-Намайг гэртээ ирэхэд “Миний дүү тайван байгаарай гээд гэртээ орсны дараа ээж, дүү нар маань, ах өнгөрсөн” гэж хэлсэн. Надад маш их харамсалтай байна. Миний амьдрал бүрхэг болчихлоо. Дүү нар маань юу ч мэдэхгүй жоохон хүүхдүүд байсан шүү дээ.
Манай ах, эгчээс цагдаа нар олон цагаар мэдүүлэг аваад, хэвлэлийнхэнд юу ч хэлж болохгүй гээд гарын үсэг зуруулсан байна лээ. Би одоогоор тийм бичиг баримтад гарын үсэг зураагүй.
Хамгийн том дүү маань коллеж төгсөх гэж байсан. Дунд дүү гуравдугаар ангийн, бага дүү нэгдүгээр ангийн сурагч байсан юм.
Бусад айлуудад ч ийм хар толбо битгий учраасай. Нүүрс түлээд олон хүн угаартаж үхэж байна. Уушгины хавдар тусаж байна. Биднийг улны амьдралаар амьдруулж байна. Амьдрал улам доройтсоор байна. Амьдрахад бэрх боллоо. Манай ээж үйлчлэгчийн ажил хийдэг байсан. Надад аав байхгүй. Ээж биднийг хүний дайтай өсгөсөн. Тэдний задлангийн хариу гараагүй байна.
Би гэрийнхнийхээ төлөө чадах бүхнээ хийнэ. Хуульчдаас тусламж авахад нээлттэй, бэлэн байна” гэв.
