БГД-ийн 22-р хороонд нэгдүгээр сарын 23-24-нийг шилжих шөнө нэг гэр бүлийн зургаан хүн угаартсаны улмаас нас барсан. Уг харамсалтай үйл явдалтай холбогдуулан гэр бүлээс нь үлдсэн цор ганц хүү нь өнөөдөр цэргээс чөлөөгөөр ирж, олон нийтэд хандсан билээ.
Тэгвэл уг асуудалд жүжигчин Б.Цэцэг ийнхүү ярьлаа
Б.Цэцэг: “Хүнээ алдах шиг гашуун харуулсал гэж үгүй. Зулай зулайгаа гишгэж төрсөн балчир дүү нар нь, тэнгэрийн илч мэт хайрлаж түшиж явах ээжийгээ алдсан хүүд чин сэтгэлээсээ эмгэнэл илэрхийлье.
Арчаагүй бидний байгаа амьдрал Үхлийн хөндий мэт үргэлжилж, амьсгалах ч эрхгүй амьдруулж байгаад гутаж байна. Өр нимгэн ижий нь үүрд орхиод явчихна чинээ төсөөлөөгүй хүүг нь аяга хөмрөхийн дайтай зовлонд унагалаа. Орь ганцаараа хорвоог туулах тавилантай гэж өөрийгөө битгий буруутгаарай дүү минь.
Тосоод авах элэг нэгт Монголчууд, туслаж дэмжээд гүйх өр зүрхтэй иргэд олон гэдэгт итгээрэй. Хорвоо даахгүй мэт хагацал үзсэн эр цэрэг дүүгийнхээ хагацлаас бага ч болов хугаслаж хойдохын буяны ажилд туслаж дэмжихийг хүсэж байгааг минь хүлээж авна уу. Гүн эмгэнэл илэрхийлье” гэв.
