УИХ-ын гишүүн Ц.Мөнхтуяа одоогоос 3 жилийн өмнө олон нийтийн хандиваар орон сууцтай болсон дөрвөн хүүхдийг байрнаас нь “хүүхдүүдийг хөөж гаргаад ядарсан багшаа оруулчихна шүү” гэж ярьж буй бичлэг цахим орчинд шүүмжлэл дагуулаад байгаа юм.
Тодруулбал, Ц.Мөнхтуяа багшаар ажиллаж байхдаа буюу 2022 онд бүтэн өнчин дөрвөн хүүхдийг байртай болгох хандивын аяныг эхлүүлж, олон нийтийн дэмжлэгээр 2 өрөө байр авч өгсөн тухай мэдээлэл цахим орчинд тухайн үед гарч байв.
Гэтэл сүүлийн хэдэн өдөр УИХ-ын гишүүн Ц.Мөнхтуяа тухайн байрыг хүүхдүүдийн нэр дээр шилжүүлж өгөөгүй талаар иргэн н.Идэржавхлан цахим хуудсандаа бичсэнээр олон нийтийн анхаарлын төвд ороод байна.
Саяхан гэхэд УИХ-ын гишүүн Ц.Мөнхтуяа чуулганы индерээс “Хүүхдүүдээсээ мөнгө харамлаж, хүүхдийн эсрэг гэмт хэрэг үйлдэж буй гишүүдэд ХАРАМСАЖ БАЙНА. Би та нарын өмнөөс ИЧИЖ БАЙНА” гэж мэдэгдэж байв.
Гэтэл өнөөдөр “Бичлэг дээр үгийн алдаа гаргасан байна. Би ямар булаагаад авчихсан байгаа биш. Мөнгө хэрэгтэй болоод барьцаанд тавьсан” гэж “ичих ч үгүй” тайлбар хийгээд зогсож байгаа Ц.Мөнхтуяа гишүүний өмнөөс сонгогчид нь “ИЧИЖ“ байна.
Мэдээллийн эх сурвалж: arslan.mn
