Өмнөговь аймагт уурхайн ажилчид нэгнийхээ гэрт архи, согтууруулах ундаа хэрэглэж, хувийн таарамжгүй харилцаанаас үүдэж нэгнээ мэсээр хөнөөсөн хэрэг гарчээ.
Тухайн хэрэг 2024 оны 12 дугаар сарын 24-ний өдөр тус аймгийн Морин заг гэх суурьшлын бүсэд гарч, шүүх хурал нь энэ сарын 02-ны өдөр болсон билээ. Энэ төрлийн гэмт хэргээс урьдчилан сэргийлэх үүднээс хэргийн процесс, шүүх хурлын шийдвэрийг тоймлон хүргэж байна.
Тухайн хэргийн газар байсан гэрч “Гэнэт зуухан дээр архины шил цохиж хагалаад толгой хэсгийн бариад босоод ирсэн. Тэгсэн талийгаач би зүгээрээ миний найз байгаа юм би өөрөө зохицуулчихна гээд аваад гарсан. Буцаж орж ирэхдээ тухайн этгээд гэрийн зүүн урд хэсэгт үүдэнд шар өнгийн усны саван дээр сууж байгаад гэнэт гал тогооны хэрэгслүүдтэй хайрцаг байснаас хутга аваад бид нар луу дайрсан. Тэгэхэд талийгаач боль гээд очоод барьж автал талийгаачийн зүүн суга, хавирга орчимд хутгалсан. Тэгээд талийгаач шууд унаад өгсөн” хэмээн шүүхэд мэдүүлжээ.
Хэрэг гарах үед эмнэлгийн байгууллагынхан шуурхай ирсэн ч хэргийн хохирогч эрэгтэй хэдийн амиа алдсан байсан тухай хавтаст хэрэгт үлдсэн байна. Хохирогчийн хувьд Өмнөговь аймагт үйл ажиллагаа явуулдаг “Говийн цагаан хөлөг” ХХК-нд жолоочоор ажилладаг байжээ. Шүүх шинжилгээгээр амь хохирогч Н. нь цээжний хөндий рүү нэвтэрч уушги, үнхэлцэг хальс, зүрх рүү хатгагдсан шархны улмаас хурц цус алдалтанд орж нас барсан байна. Тухайн үедээ дунд зэргийн согтолттой байсан байна.
Улмаар Өмнөговь аймаг дахь сум дундын шүүх хэрэгт холбогдогч этгээдийг Эрүүгийн хуулийн тусгай ангийн 10.1 дүгээр зүйлийн 1 дэх хэсэгт зааснаар 12 жилийн хугацаагаар хорих ял оноосон байна.
Эх сурвалж: eguur.mn
