“Монполимет” группийн ТУЗ-ийн дарга Нармандахын Мөнхнасан нь нийгмийн хариуцлагын хүрээнд хүүхдийн эрх, боловсрол, эмзэг бүлгийн дэмжлэг, тогтвортой хөгжлийн чиглэлээр олон сайн үйлсийн ажил санаачлан хэрэгжүүлдэг. Тэрбээр энэ удаад Нийслэлийн ерөнхий боловсролын 112 дугаар сургууль тохилог, дулаахан, шинэ өнгө төрхтэй болгожээ.
Энэ талаараа “Шинжлэх ухааны болон уламжлалт Буддын гүн ухааны мэдлэг, чадварыг зааж сургадаг Нийслэлийн ерөнхий боловсролын 112 дугаар сургууль тохилог, дулаахан, шинэ өнгө төрхтэй байрандаа орлоо. Энэхүү сургууль өнөөг хүртэл өөрийн гэсэн байргүй ч сургалтын үйл ажиллагаагаа тасралтгүй явуулдаг. Буддын гүн ухааны чиглэлээр суралцах хүсэлтэй олон хүүхдэд эрдэм номын үйлийг түгээсээр байсан билээ. Харин одоо Буддын гүн ухааныг ерөнхий эрдмийн хичээлтэй хослуулан хичээнгүйлэн суралцаж буй лам хүүхдүүдэд маань орчин цагийн шинжлэх ухааны эрдэм мэдлэгээс шимтэн хүртэх бүрэн боломж нээгдлээ.
Ийнхүү боловсролын салбарт бас нэгэн шинэ өнгө төрх, шинэ гарц нээж, хөгжлийн шинэ түүхийг эхлүүллээ. Бяцхан ламхай нар минь урам зориг дүүрэн суралцаж, эрдэм ухаан, ёс суртахуун, гэгээн үйлсээрээ монголынхоо болон дэлхийн буддизмд эерэг хувь нэмрээ оруулж нинж оюунт ирээдүйг бүтээнэ хэмээн бэлгэшээж байна” хэмээн өөрийн сошиал хуудастаа бичжээ.
Мэдээллийн эх сурвалж: eguur.mn
