Даваа гараг бүр УИХ дахь намын бүлгүүд хаалттай хуралддаг. Энэ дагуу МАН-ын бүлэг яг одоо хаалттай хуралдаж байна. Хуралдаанаар,
- Хотын даргын асуудал
- Татварын багц хууль
- Ерөнхийлөгчийн сонгуулийн тухай хуулийг хэлэлцэх аж.
Тодруулбал, өнгөрсөн амралтын өдрүүдэд Ерөнхий сайд Н.Учрал Нийслэлийн Засаг дарга бөгөөд Улаанбаатар хотын захирагч Х.Нямбаатарыг үүрэгт ажлаас нь чөлөөлж буйгаа мэдэгдсэн. Ингэхдээ Хотын даргыг огцруулах асуудал нь Ерөнхий сайдын бүрэн эрхийн асуудал бөгөөд огцруулах бичигт гарын үсэг зурснаар хүчин төгөлдөр болсон аж.
Улмаар Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн дагуу Хотын даргыг огцруулах шийдвэр албажсанаас хойш 15 хоногийн дотор дараагийн хүнийг нэр дэвшүүлэх учиртай. Энэ дагуу бүлгийн хуралдаанаар дараагийн Хотын даргын асуудлыг хэлэлцэнэ гэх мэдээлэл байна.
Бүлгийн хуралдаанаас гаргасан шийдвэрийн талаар бид эргэн мэдээлэх болно.
